രണ്ടാംക്കെട്ട്

"ഇത്രയും ദൃതി പിടിച്ച് ഒരു രണ്ടാം കെട്ടുകാരനെ കൊണ്ട് കെട്ടിക്കണ്ട കാര്യം എന്താ.. നന്നായി പഠിക്കുന്ന കുട്ടി അല്ലേ."

"അവർക്ക് വേഗം വേണം അത്രേ. ചെക്കന്റെ ജാതകപ്രകാരം ഈ മാസം കഴിഞ്ഞ ദോഷം ആണെന്ന്."

" പിന്നെ വേണുന് ഒരു ഭാരം പോയി കിട്ടൂല്ലോ. ബാക്കി 4 എണ്ണം കിടക്കല്ലേ കെട്ടിക്കാൻ."

"അത് പെറ്റ് കൂട്ടുമ്പോ ആലോചിക്കണം."

അവർ അടക്കി ചിരിച്ചു.

🔹🔹🔹🔹🔹🔹🔹🔹🔹🔹🔹🔹🔹🔹🔹

നാളെയാണ് തന്റെ കല്യാണം അതും ഒരു രണ്ടാം കെട്ടുകാരനായി.
ഒരുപാട് എതിർത്തു നോക്കിയതാ പക്ഷേ അനിയത്തിമാർ പോലും ചേച്ചി ഈ കല്യാണത്തിന് സമ്മതിച്ച ഞങൾ കൂടി രക്ഷപെടും എന്ന് പറഞ്ഞപ്പോൾ പിടിച്ച് നിൽക്കാൻ പറ്റാതായി.

പൊന്നും പണവും എല്ലാം ഇങ്ങോട്ട് കിട്ടും പിന്നെ വേറെ എന്ത് ആലോചിക്കാനാ ഇതിലും വലിയ ഭാഗ്യം അഞ്ച് പെണ്മക്കൾ ഉള്ള ഒരു ഓട്ടോക്കാരന് കിട്ടാനില്ലന്നാ അച്ഛമ്മ പറയുന്നേ. ഒരു ഭാരം, ഒന്നും അറിയാണ്ട് ഒഴിഞ്ഞ് കിട്ടില്ലേ. പിന്നെ ബാക്കി നാലെണ്ണത്തിന്റെ കാര്യം നോക്കിയ മതിയല്ലോ.

"നിന്റെ ദോഷം കൊണ്ടാണ് ഗൾഫിലെ ജോലി പോയി ഇവിടെ ഓട്ടോ ഓടിച്ചു നടക്കേണ്ടി വന്നതെന്ന് അച്ഛൻ എപ്പോഴും പറയുന്നത്. ഇനി നീ ഈ കല്യാണത്തിന് മുടക്കം പറഞ്ഞാൽ നിന്റെ മാത്രം അല്ല എന്റെ കൂടി സമാധാനം പോയിക്കിട്ടും. അല്ലെങ്കിലേ അഞ്ചും പെണ്ണുങ്ങൾ ആയത് എന്റെ കുഴപ്പം ആണെന്ന നിന്റെ അച്ഛനും അച്ഛമ്മേ പറയുന്നത്. ഇനി ഇതും കൂടി എന്റെ തലയിൽ ആവും. വളർത്ത്ദോഷം ആണെന്നെ നിന്റെ അമ്മായിമാരും പറയൂ. "

അമ്മ കൂടി കൈ വിട്ടപ്പോൾ പിന്നെ ഒന്നും പറയാൻ ഇല്ലായിരുന്നു.

അയാളുടെ ആദ്യ ഭാര്യക്ക് എന്തായിരിക്കും സംഭവിച്ചിരിക്കുക. അച്ഛന് അറിയുമായിരിക്കും പക്ഷേ തന്നോട് ഇത് വരെ ഒന്നും പറഞ്ഞിട്ടില്ല. അറിയണ്ട എന്നായിരിക്കും. അത് എന്നും അങ്ങനെ ആണല്ലോ. അവർ പറയുന്നത് അനുസരിച്ച് വളർന്ന പാവ അല്ലേ ഞാൻ.

അച്ഛൻ എടുത്ത വസ്ത്രം ധരിക്കുന്നത് പോലെ, അച്ഛൻ പറഞ്ഞത് പഠിച്ചത് പോലെ, അച്ഛൻ പറയുന്ന ആളെ വിവാഹം ചെയ്യുക. ഇനി നാളെ അയാള് തീരുമാനിക്കും ഞാൻ എന്ത് ധരിക്കണം, എന്ത് തിന്നണം, എന്ത് പറയണം അങ്ങനെ ആയിരിക്കും ഇനി എന്റെ ജീവിതം.

🔹🔹🔹🔹🔹🔹🔹🔹🔹🔹🔹🔹🔹🔹🔹