Chapter 1

രാത്രി മോളെ ഉറക്കിക്കിടത്തി ഒരുവിധം സമാധാനമായി ഇരുന്ന് ഫോണെടുത്ത് വെറുതെ ഇൻസ്റ്റാഗ്രാം റീൽസ് സ്ക്രോൾ ചെയ്ത് കാണുന്നതിനിടയിലാണ് ഒരു സ്ട്രീറ്റ് ഫാഷനെക്കുറിച്ചുള്ള ലൈവ് എന്റെ കണ്ണിൽപ്പെട്ടത്. ഒരൊറ്റ നോട്ടത്തിൽ എൻ്റെ ഉള്ളിലൂടെ ഒരു മിന്നൽ കടന്നു പോയി... ആ മുഖം... ഞാൻ പെട്ടെന്ന് നേരെയിരുന്ന് സ്ക്രീനിലേക്ക് ശ്രദ്ധിച്ചു, പക്ഷേ അപ്പോഴേക്കും ആ ലൈവ് ചെയ്തിരുന്നയാൾ ക്യാമറയുടെ ആംഗിൾ മാറ്റിയിരുന്നു. എന്റെ നെഞ്ചിടിപ്പ് കൂടി, ഫോൺ പിടിച്ചിരുന്ന കൈകൾ വിയർക്കാൻ തുടങ്ങി.

ഞാനുടനെ സമയം നോക്കി, ലൈവ് നടക്കുന്നത് ഇവിടെത്തന്നെയാണെന്ന് ഉറപ്പുവരുത്തി.

പിന്നെ വേഗം ഇൻസ്റ്റാഗ്രാം ക്ലോസ് ചെയ്ത് ഭർത്താവ് മാധവിനെ വീഡിയോ കോൾ ചെയ്തു. ബിസിനസ്സ് ആവശ്യത്തിനായി മൂന്നു ദിവസത്തേക്ക് കോയമ്പത്തൂരിലേക്ക് ആണെന്ന് പറഞ്ഞാണ് ഏട്ടൻ പോയത് , പക്ഷേ ഞാനിപ്പോൾ ലൈവിൽ കണ്ടത് മറ്റൊരു പെണ്ണിന്റെ കൂടെ അവളുടെ തോളിൽ കയ്യിട്ട് നിൽക്കുന്ന ഏട്ടനെയാണ്.

കുറേ നേരം റിംഗ് ചെയ്തതിന് ശേഷമാണ് ഏട്ടൻ കോൾ എടുത്തത്. ഏട്ടന്റെ ക്യാമറ ചെറുതായി ഒന്നു വിറച്ചു, ആ സുന്ദരമായ മുഖം എന്റെ ഫോണിന്റെ സ്ക്രീനിൽ തെളിഞ്ഞു.

"ഹായ് മോളേ!" ഏട്ടൻ സ്നേഹം നിറഞ്ഞ പുഞ്ചിരിയോടെ വിളിച്ചപ്പോൾ എൻ്റെ മുഖത്ത് ഒരു വിളറിയ ചിരിയാണ് തെളിഞ്ഞത്...

"ഏട്ടൻ ഇതെവിടെയാ?" ഏട്ടന്റെ ഫോണിലെ ദൃശ്യങ്ങൾ ശ്രദ്ധിച്ചുകൊണ്ട് ഞാൻ തിടുക്കത്തിൽ ചോദിച്ചു. ഒരു റസ്റ്റോറന്റിന്റെ ഇടനാഴിയിൽ നിൽക്കുന്നതുപോലെയാണ് തോന്നിയത്. വെളുത്ത ഷർട്ടും ടൈയും ആയിരുന്നു ഏട്ടന്റെ വേഷം. എന്നാൽ ഞാൻ ലൈവിൽ കണ്ടയാൾ ഇട്ടിരുന്നത് ചാരനിറത്തിലുള്ള ഒരു ജാക്കറ്റായിരുന്നു.

"ഞാനൊരു ക്ലയന്റിന്റെ കൂടെ ഡിന്നർ കഴിക്കുകയാണ്. നിന്റെ കോൾ വന്നപ്പോൾ പുറത്തേക്ക് ഇറങ്ങിയതാ. എന്തുപറ്റി? എന്തെങ്കിലും പ്രശ്നമുണ്ടോ? അനന്യ ഉറങ്ങിയോ?" ഏട്ടൻ ചോദിച്ചു.

"ഏട്ടൻ കോയമ്പത്തൂരിൽ തന്നെയാണോ ഉള്ളത് ?" ഏട്ടന്റെ ചോദ്യം കേൾക്കാത്ത ഭാവത്തിൽ ഞാൻ വീണ്ടും ചോദിച്ചു.

"അതെന്താ അങ്ങനെ ചോദിച്ചത്? ഞാൻ കോയമ്പത്തൂരിൽ തന്നെയാണ്. എന്താ കാര്യം?" ഏട്ടൻ ഗൗരവത്തോടെയും ആകാംഷയോടെയും എന്നെ നോക്കി.

"ഏയ്... ഒന്നുമില്ല!" എൻ്റെ തല പുകയുന്നുണ്ടായിരുന്നു.. ഞാൻ എന്തോ പിറുപിറുത്തു. എന്നിട്ട് ചോദിച്ചു, "എന്നാ വീട്ടിലേക്ക് വരുന്നത്?"

"ഉടനെ വരാം... ഇവിടുത്തെ കാര്യങ്ങളൊക്കെ ഒതുക്കിയിട്ട് ഞാൻ പെട്ടെന്ന് വരാം. നിനക്ക് എന്നെ മിസ്സ്‌ ചെയ്യുന്നുണ്ടോ?" ഏട്ടൻ സ്നേഹം നിറഞ്ഞ കണ്ണുകളോടെ എന്നെ നോക്കി പുഞ്ചിരിച്ചു.

"ഞാൻ എത്രയും പെട്ടെന്ന് വരാൻ നോക്കാം. സമയം ഒരുപാടായി. നീ നേരത്തെ കിടന്നുറങ്ങിക്കോ, കേട്ടോ? എനിക്കിവിടെ കുറച്ചു കാര്യങ്ങൾ കൂടി തീർക്കാനുണ്ട്. ബൈ!" എനിക്കൊരു ഉമ്മ തരുന്നതുപോലെ കാണിച്ച് ഏട്ടൻ കോൾ കട്ട് ചെയ്തു.

വെറുതെ സംശയിച്ചല്ലോ എന്നോർത്ത് എനിക്ക് എന്നോടുതന്നെ ദേഷ്യവും വിഷമവും തോന്നി. ഞങ്ങൾ കണ്ടുമുട്ടുമ്പോൾ വെറുമൊരു സാധാരണക്കാരനായിരുന്നു ഏട്ടൻ. എങ്കിലും എന്നെ ഒരുപാട് സ്നേഹിക്കുന്ന, കാണാൻ സുന്ദരനായ, എല്ലാത്തിനും മികച്ചൊരു ഭർത്താവായിരുന്നു മാധവ്  . നഗരത്തിൽ സാധാരണ കുടുംബത്തിൽ, അസുഖക്കാരിയായ ഒരു അനിയത്തി മാത്രമുള്ള ഏട്ടനെ, എനിക്ക് പുറകേ നടന്ന പലരെയും ഒഴിവാക്കി സൗന്ദര്യം കണ്ടാണ് ഞാൻ കൂടെ കൂട്ടിയത്.

കോളേജ് പഠനം കഴിഞ്ഞ്, എന്റെ വീട്ടുകാരെക്കൊണ്ട് വീടിന്റെ ആധാരം പണയം വെപ്പിച്ച് ഞങ്ങൾ ഒരു ഡിസ്റ്റ്രിബ്യൂഷൻ ഏജൻസി തുടങ്ങി. മാധവ് സാധനങ്ങൾ എത്തിക്കുന്ന കാര്യങ്ങൾ നോക്കിയപ്പോൾ, ഞാൻ ക്ലയന്റുകളുമായി സംസാരിച്ച് ഓടിനടന്നു. ഭാഗ്യത്തിന്, ഞങ്ങളുടെ കമ്പനി പതിയെ വളർന്നു, നല്ല നിലയിലായി. ഞാൻ ഗർഭിണിയായപ്പോൾ, കമ്പനി പൂർണ്ണമായും ഏട്ടനെ ഏൽപ്പിച്ച് കുഞ്ഞിനെയും വീടിനെയും നോക്കി ഞാൻ ഒതുങ്ങിക്കൂടി.

മകൾ അനന്യക്ക് ഇപ്പോൾ നാല് വയസ്സായി. മറ്റുള്ളവർക്ക് അസൂയ തോന്നുന്നത്ര സന്തോഷത്തോടെയായിരുന്നു ഞങ്ങളുടെ മൂന്നംഗ കുടുംബം ജീവിച്ചിരുന്നത്. ഞങ്ങൾക്ക് എല്ലാവരും അറിയേ ആഘോഷമായി ഒരു കല്യാണം നടത്താൻ കഴിയാത്തതിൽ ഏട്ടന് വലിയ വിഷമമുണ്ടായിരുന്നു. അതുകൊണ്ട് ജീവിതത്തിൽ ഒരു കുറവും വരുത്താതെ എന്നെ പൊന്നുപോലെ നോക്കുമെന്ന് ഏട്ടൻ എപ്പോഴും പറയുമായിരുന്നു. അങ്ങനെയുള്ളൊരു ഭർത്താവ് എങ്ങനെയാണ് എന്നെ ചതിക്കുക?

ഓരോരോ സീരിയലുകൾ കണ്ട് എന്റെ തലയ്ക്ക് വട്ടായതാവും. ഞാൻ ചുണ്ടുകൾ ചേർത്തുപിടിച്ച് ചിരിച്ചു.

വീണ്ടും ബെഡിൽ വന്ന് കിടന്നപ്പോഴും, ഇൻസ്റ്റാഗ്രാം ലൈവിൽ മിന്നിമറഞ്ഞ ആ രൂപം എന്റെ മനസ്സിൽനിന്നും പോയിരുന്നില്ല. ഞാൻ ഏട്ടനെക്കുറിച്ച് ഒരുപാട് ചിന്തിക്കുന്നതുകൊണ്ടാവാം. പോരാത്തതിന്, ആ ജാക്കറ്റ് എനിക്ക് നല്ല പരിചയം തോന്നി. കാരണം, യാത്ര പോകുന്നതിന് മുൻപ് ഞാനാണ് അത് തേച്ച് കൊടുത്തത്. അപ്പോൾ ലൈവിൽ കണ്ടയാളും അതേപോലൊരു ജാക്കറ്റ് ഇട്ടിരുന്നു എന്ന ചിന്ത എന്നെ വല്ലാതെ കുഴപ്പത്തിലാക്കി.

അടുത്ത ദിവസം വൈകുന്നേരം അടുക്കളയിൽ നിൽക്കുമ്പോഴാണ് കോളിംഗ് ബെൽ ശബ്ദിക്കുന്നത് കേട്ടത്.... ഹാളിൽ ഇരുന്ന് കളിക്കുന്ന മോളെ ഒന്ന് നോക്കി ഞാൻ ചെന്ന് വാതിൽ തുറന്നു....

"സർപ്രൈസ്..." മുന്നിലേക്ക് ചാടി വീണ മാധവിനെ കണ്ട ഞാൻ ഒന്ന് ഞെട്ടി...

" ഏട്ടാ... നാളെയെ വരൂ എന്ന് പറഞ്ഞിട്ട്... " ഞാൻ ആകെ വണ്ടറടിച്ചു നിൽക്കുകയായിരുന്നു ...

മാധവ്  അനന്യക്ക് വേണ്ടി കൊണ്ട് വന്ന പലഹാരങ്ങളും മറ്റും എനിക്ക് നേരെ നീട്ടി.... അടുത്തേക്ക് വന്ന അനന്യയെ വാരിയെടുത്ത് ഞങ്ങളെ രണ്ടുപേരെയും ചേർത്തുപിടിച്ച് സ്നേഹം പ്രകടിപ്പിച്ചപ്പോൾ വീടാകെ സന്തോഷം നിറഞ്ഞതുപോലെ തോന്നി. ഏട്ടന് ഇഷ്ടപ്പെട്ട കുറച്ച് വിഭവങ്ങൾ ഒരു സമ്മാനം പോലെ ഞാൻ അടുക്കളയിൽ ഒരുക്കാൻ തുടങ്ങി.

ഭക്ഷണം കഴിക്കാനിരുന്നപ്പോൾ ഏട്ടൻ എന്നെ നോക്കി പറഞ്ഞു, "ഇവിടെയെന്താ ഒരു എണ്ണമണം? നീ പോയി കുളിക്കുന്നില്ലേ?"

ഞാൻ സ്വയം ഒന്നു മണത്തുനോക്കി, പിന്നെ ചിരിയോടെ പറഞ്ഞു, "അത് നല്ല ഭക്ഷണത്തിന്റെ മണമാണ്. ഏട്ടന് ഈ മണം ഇഷ്ടമല്ലേ?"

അതു കേട്ട് ചിരിച്ചുകൊണ്ട് ഏട്ടൻ സ്നേഹത്തോടെ എന്റെ മുടിയിഴകളിൽ തലോടി. എന്നിട്ട് ഒരുരുള എന്റെ വായിലേക്കും, ഒരു കഷണം അനന്യയുടെ വായിലേക്കും വെച്ചുകൊടുത്തു. "ശരി, എന്റെ ചക്കരകളേ... നമുക്ക് കഴിക്കാം!"

അത്താഴം കഴിഞ്ഞ് അനന്യയെ വേഗം ഉറക്കിക്കിടത്തി ഞാനും പോയി കുളിച്ചു. ഞാൻ ഏട്ടനോട് ചേർന്നുനിന്നുകൊണ്ട് കൊഞ്ചലോടെ ചോദിച്ചു, "ഇപ്പോഴും എനിക്ക് എണ്ണയുടെ മണമുണ്ടോ?"

ഒരു ചിരിയോടെ ഏട്ടൻ എന്റെ കവിളിൽ പതുക്കെ നുള്ളി. "ഞാൻ നിന്നെ ഒരുപാട് മിസ്സ് ചെയ്തു, മോളേ!" മറുപടി പറയാൻ പോലും അവസരം തരാതെ ഏട്ടൻ എന്നെ ബെഡിലേയ്ക്ക് വലിച്ചു. എന്തോ, ഇന്ന് ഏട്ടന് പതിവില്ലാത്ത ഒരു ആവേശമുണ്ടായിരുന്നു.

എല്ലാം കഴിഞ്ഞപ്പോൾ, പുഞ്ചിരിയോടെ ഞാൻ ബാത്ത്റൂമിലേക്ക് പോകുന്ന ഏട്ടന്റെ ഉയരമുള്ള രൂപം നോക്കിക്കിടന്നു. ഞാൻ എഴുന്നേറ്റ് വൃത്തിയാക്കാൻ തുടങ്ങിയപ്പോഴാണ് ബെഡിനരികിലിരുന്ന ഏട്ടന്റെ ഫോൺ മിന്നിയത്. ഒരു വാട്സ്ആപ്പ് മെസ്സേജ് വന്നതായിരുന്നു അത്. അതിലേക്ക് നോക്കിയ ഞാൻ തറഞ്ഞുനിന്നുപോയി.

തുടരും