മധുരമീ പ്രണയം ❤️ 1

മധുരമീ പ്രണയം ❤️


"ഇപ്പൊൾ കല്യാണം കഴിച്ചില്ലെങ്കിൽ എന്താ ചത്ത് പോകുമോ...."
നിത്യ സൗദാമിനിയമ്മയെ രൂക്ഷമായി നോക്കി കൊണ്ട് ചോദിച്ചു...

"വായ മൂടെടി...."
സൗദാമിനിയമ്മ അവൾക്ക് നേരെ കൈ വീശി...
അമ്മയുടെ തല്ലിൽ നിന്ന് ഒഴിഞ്ഞു മാറി നിത്യ ഹാളിലേക്ക് പാഞ്ഞു...


"മുത്തശ്ശാ....."
നടുമുറ്റത്തേക്ക് ഓടി വന്നു തൂണിൽ പിടിച്ച് കൊണ്ട് മുത്തച്ഛനെ നോക്കി നിത്യ...


അവിടെ തിണ്ണയിൽ ഇരുന്നു എന്തോ നോക്കുകയാണ് മുത്തച്ഛൻ നാരായണൻ മാഷ്...


"എനിക്കിപ്പോൾ കല്യാണം വേണ്ട മുത്തശ്ശാ....."
ശാഠ്യം പോലെ നിത്യ പറഞ്ഞു..

നാരായണൻ മാഷ് കണ്ണുകൾ മാത്രം ഉയർത്തി അവളെ നോക്കി.
കൃത്യമായ താക്കീത് ഉണ്ട് അതിൽ...


"അതൊന്നും പറഞ്ഞാല് പറ്റില്ല... ബ്രോക്കർ ദിനേശൻ ഇന്ന് കൂട്ടരേ കൊണ്ട് വരാമെന്ന് ഏറ്റുപോയി... അതും അല്ല ഈ ചിങ്ങത്തിന് മുൻപ് നടത്തണം..."


"എനിക്ക് കല്യാണം വേണ്ട...."
നിത്യ ചിണുങ്ങി...


"പറഞത് മനസ്സിലായില്ലേ കുട്ട്യേ... ഈ ചിങ്ങത്തിന് മുൻപ് നടത്തണം... ഇല്ലെങ്കിൽ പിന്നെ മംഗല്യ യോഗം ഇല്ല....."
നാരായണൻ മാഷ് ദീർഘ നിശ്വാസത്തോടെ പറഞ്ഞു...


"എങ്കിൽ കല്യാണം വേണ്ട... അത്രയല്ലേ ഉള്ളൂ..... ഞാൻ കല്യാണം കഴിക്കാതെ ജീവിച്ചോളാം...."
നിത്യ മുത്തച്ഛൻ്റെ അടുത്ത് വന്നിരുന്നു കൊണ്ട് പറഞ്ഞു..


നിത്യയുടെ അച്ഛൻ അവൾക്ക് അഞ്ച് വയസുള്ളപ്പോൾ മരിച്ചതാണ്...
അതിന് ശേഷം സൗദാമിനിയെയും രണ്ട് മക്കളെയും നോക്കിയത് നാരായണൻ മാഷാണ്...
നിത്യക്ക് ഒരു അനിയത്തി കൂടിയുണ്ട് വിദ്യ...
പ്ലസ് ടൂവിൽ പഠിക്കുന്നു...


"അവരിപ്പോൾ ഇങ്ങെത്തും കുട്ടി. പതിനൊന്ന് മണിക്ക് വരുമെന്നാ ആ ദിനേശൻ പറഞ്ഞത്....."
നാരായണൻ മാഷ് അതും പറഞ്ഞു എഴുന്നേറ്റു.

ഒരു കൂടയിൽ നിറയെ മുല്ലപ്പൂക്കളുമായി വിദ്യ അവിടേക്ക് വന്നു.
മുറ്റത്ത് ഒരു കോണിൽ നിത്യക്ക് ഒരു പൂന്തോട്ടം ഉണ്ട്.
മുല്ലയും പിച്ചിയും പനിനീരും നിത്യ അവിടെ വെച്ച് പിടിപ്പിച്ചിട്ടുണ്ട്...


വീർപ്പിച്ചു വെച്ച മുഖത്തോടെ നിത്യ മുഖം കുനിച്ചിരുന്നു...

"എന്താ നിത്യേച്ചിക്ക് പറ്റിയത്.... മുഖത്ത് ഒരു തെളിച്ചം ഇല്ലല്ലോ...."
വിദ്യ അവളുടെ അടുത്തേക്ക് വന്നിരുന്നു...

വിദ്യയുടെ കൈയിലെ കൂടയിൽ നിന്ന് മുല്ലപ്പൂ എടുത്ത് മൂക്കോട് ചേർത്ത് ഗന്ധം വലിച്ചെടുത്തു നിത്യ...


"മുത്തശ്ശന് ഈ ആലോചന ബോധിച്ച മട്ടാണ്....."
നിത്യ പറഞ്ഞു...


"നല്ല ബന്ധം ആണത്രേ... ഈ കല്യാണം നടന്നാൽ ചേച്ചിയുടെ ഭാഗ്യമാണ് എന്നാ മുത്തശ്ശൻ അമ്മയോട് പറയുന്നത് കേട്ടത്...."
വിദ്യ സ്വകാര്യം പോലെ പറഞ്ഞു...


"എനിക്ക് ഈ ഭാഗ്യം വേണ്ടെങ്കിലോ...."
നിത്യ ചുണ്ട് കൂർപ്പിച്ചു...


"ഏതായാലും കണ്ട് പോകട്ടെ ചേച്ചി... ചിലപ്പോൾ കാണാൻ വരുന്നത് ദുൽക്കർ സൽമാൻ വല്ലോം ആണെങ്കിലോ...."
വിദ്യ കളിയോടെ ചോദിച്ചു...


"പൊയ്ക്കോ അവിടുന്ന്...
എൻ്റെ ചങ്ക് കത്തുകയാ... എങ്ങനെയുള്ള ആളാണോ ആവോ... മൊരടൻ ആയിരിക്കുമോ.... അതോ കർക്കശക്കാരൻ ആയിരിക്കുമോ... ഫ്രണ്ട്‌ലി ആയിരിക്കുമോ.. അതോ ഗൗരവക്കാരൻ ആയിരിക്കുമോ..'
നിത്യ ആലോചനയോടെ ചോദിച്ചു.


"നിത്യേ....."
അടുക്കളയിൽ നിന്ന് അമ്മയുടെ വിളി കേട്ടതും നിത്യ ചാടി എഴുന്നേറ്റ് ഓടി...


"നീ ഈ കുപ്പായം മാറ്റിക്കെ... എന്നിട്ട് നല്ലൊരണ്ണം എടുത്തുടുക്ക്...."
അമ്മ കർക്കശമായി പറഞ്ഞു.

നിത്യ താൻ ഇട്ട കുപ്പായത്തിലേക്ക് നോക്കി.
പഴയ ദാവണിയാണ്.
ബ്ലൗസ് പിഞ്ഞി പോയിട്ടുണ്ട്...


"എനിക്ക് ഈ കല്യാണം വേണ്ട അമ്മേ...."
നിത്യ വീണ്ടും പറഞ്ഞു...


"അച്ഛൻ്റെ ബുദ്ധിമുട്ട് നീ കാണുന്നത് അല്ലേ മോളെ...
ആകെ അരിഷ്ട്ടിച്ചാണ് ജീവിക്കുന്നത്...
അച്ഛൻ്റെ ചങ്ക് കത്തുന്നത് എനിക്ക് കാണാം..
ആരെങ്കിലും ഒരാളെയെങ്കിലും സുരക്ഷിതമായ ഒരിടത്ത് ഏൽപ്പിക്കാൻ ഓടി നടക്കുകയാണ്...
ഈയിടെയായി മരിച്ചു പോകുമോ എന്ന പേടി അച്ഛൻ്റെ മനസിൽ കുടുങ്ങി കിടക്കുന്നുണ്ട്.
അച്ഛന് വല്ലതും പറ്റിയാൽ നമുക്ക് ആരും ഇല്ലല്ലോ...
ആ പേടിയാണ് മനസ് നിറയെ.....'
അമ്മ പാതകത്തിന് മുകളിലേക്ക് ഇരുന്നു...

"അയ്യോ എൻ്റെ അമ്മക്കിളി സീരിയസ് ആയോ...."
നിത്യ അമ്മയുടെ അടുത്തേക്ക് വന്നു ആ താടിത്തുമ്പിൽ പിടിച്ച് ഉയർത്തി...


"അമ്മ വിഷമിക്കണ്ട... വരുന്നത് ഏത് കോന്തൻ ആയാലും ഞാൻ കെട്ടാം...."
നിത്യ ചിരിയോടെ പറഞ്ഞു...


തൻ്റെ മുറിയിലേക്ക് പോയി നിത്യ നല്ലൊരു ദാവണി എടുത്തിട്ടു.
നീളൻ മുടി കോതി കൊണ്ട് നിന്നപ്പോൾ വാതിൽ തുറന്നു വിദ്യ അവിടേക്ക് വന്നു.
മുല്ലപ്പൂ കോർത്ത മാല മേശപ്പുറത്ത് വെച്ചു...


"മുടിയിൽ ചൂടണം... ഞാൻ ചേച്ചിക്ക് വേണ്ടി കഷ്ടപ്പെട്ട് പറിച്ചു കോർത്തെടുത്തതാ...."
വിദ്യ പറഞ്ഞു.

എളിയിൽ കൈകുത്തി കൊണ്ട് നിത്യ അനിയത്തിയെ നോക്കി...


"കഷ്ടപ്പെട്ട് നട്ട് വളർത്തിയവരോട് ഒന്ന് പറഞ്ഞോ പറിക്കുന്നത്തിന് മുൻപ്...."
പുരികം രണ്ടും ഉയർത്തി നിത്യ ചോദിച്ചു...

"എൻ്റെ ചേച്ചി നട്ടത് അല്ലേ... അതിന് എനിക്ക് ആരോടും സമ്മതം ചോദിക്കണ്ട...."
വിദ്യ മുഖം കോട്ടി കൊണ്ട് പറഞ്ഞു...


വിദ്യ റൂമിൽ നിന്ന് പോയതും നിത്യ കണ്ണാടിയുടെ മുൻപിൽ വന്നു നിന്ന് മുല്ലപ്പൂ മുടിയിൽ സ്ലൈഡ് കൊണ്ട് ഉറപ്പിച്ചു...


നാരായണൻ മാഷും ബ്രോക്കർ ദിനേഷനും ഉമ്മറത്ത് ഇരിക്കുമ്പോൾ ഒരു കാർ മുറ്റത്തേക്ക് വന്നു നിന്നു.
ഡ്രൈവിംഗ് സീറ്റിൽ നിന്ന് സുന്ദരനായ ഒരു ചെറുപ്പക്കാരൻ ഇറങ്ങി...


"ആ.. വന്നല്ലോ...."
ദിനേശൻ തിണ്ണയിൽ നിന്ന് മുറ്റത്തേക്ക് ഇറങ്ങുമ്പോഴേക്കും  കോഡ്രൈവിംഗ് സീറ്റിൽ നിന്ന് ഒരു പ്രായം ചെന്ന പുരുഷനും ഇറങ്ങി.
പയ്യൻ്റെ അച്ഛനാണ് അതെന്നു നാരായണൻ മാഷ് ഊഹിച്ചു...



പുറകിലെ ഡോർ തുറന്ന് പയ്യൻ്റെ അമ്മയും സഹോദരിയും ഇറങ്ങി...

"ഇത് പെണ്ണിൻ്റെ അമ്മാച്ഛൻ... പ്രൈമറി സ്കൂൾ വാധ്യാർ ആയിരുന്നു....'
ചെക്കൻ്റെ കൂട്ടർക്ക് നാരായൺ മാഷിനെ പരിചയപ്പെടുത്തി കൊണ്ട് ദിനേശൻ പറഞ്ഞു...


ചെറുക്കനെ കണ്ടിട്ട് തരക്കേടില്ല...
യോഗ്യൻ...

വാതിൽ മറവിൽ ഒളിച്ചിരുന്നു പുറത്തേക്ക് നോക്കി കൊണ്ടിരുന്ന വിദ്യ അകത്തേക്ക് പാഞ്ഞു...

"നല്ല സുന്ദരൻ ചെക്കൻ... എന്ത് രസാ കാണാൻ.....  നല്ല മുടി... വെളുത്ത കളർ... നല്ല ഉയരം.... ചുവപ്പ് കളർ ഷർട്ടും ബ്ലാക്ക് ജീൻസും... നല്ല കട്ടി മീശ...."
മറന്നു പോകാതിരിക്കാൻ വേഗത്തിൽ വേഗത്തിലാണ് വിദ്യ പറയുന്നത്...


"ചേച്ചിക്ക് നന്നായി ചേരും...."
വിദ്യ തുള്ളിച്ചാടി കൊണ്ട് പറഞ്ഞു..

നിത്യ ചൂളി കൊണ്ട് അമ്മയെ നോക്കി.
വിദ്യ പറയുന്നതൊന്നും ശ്രദ്ധിക്കാത്ത മട്ടിൽ പലഹാര പൊതി പൊട്ടിക്കുന്ന തിരക്കിലാണ് അമ്മ...


"കൂടെ വന്നതാ അച്ഛനും അമ്മയും അനിയത്തിയും.. അനിയത്തിയുടെ മുടി സിനിമനടിമാരെ പോലെ പറന്നു കളിക്കുന്നു... നല്ല വെല കൂടിയ ചുരിദാർ....."
വിദ്യ ഒറ്റ ശ്വാസത്തിൽ പറഞ്ഞു..


"അമ്മ പട്ടുസാരിയാ ചുറ്റിയത്.. അമ്മയെ കാണാൻ നല്ല ചേല്...."
വിദ്യ പറയുന്നത് നിർത്തുന്ന ലക്ഷണം ഇല്ലെന്ന് കണ്ടതും നിത്യ അവളുടെ കൈത്തണ്ടയിൽ നല്ലൊരു നുള്ള് വെച്ച് കൊടുത്തു.

"മതി... മതി...."
നിത്യ പറഞ്ഞു...


നടുമുറ്റത്തോട് ചേർന്നുള്ള ഹാളിൽ നിന്നുള്ള സംസാരം കേൾക്കാം.
നിത്യയുടെ നെഞ്ച് ശക്തമായി മിടിച്ചു.
ആദ്യത്തെ പെണ്ണുകാണലാണ്....
ചെറുക്കൻ എങ്ങനെയുള്ള ആൾ ആയിരിക്കും...
വിദ്യ പറഞ്ഞത് അവൾക്ക് ഓർമ വന്നു..
വെളുത്ത നിറം..
കട്ടിമീശ...
ഒത്ത ഉയരം...

നിത്യയുടെ മേൽചുണ്ടിൽ വിയർപ്പ് പൊടിഞ്ഞു....
നെഞ്ച് കിടുകിടുത്തു...

"കോന്തനെ എനിക്ക് ഇഷട്ടമായി അമ്മേ...."
വിദ്യ കളിയാക്കി കൊണ്ട് പറഞ്ഞപ്പോൾ നിത്യ അവളെ നോക്കി കണ്ണുരുട്ടി...


"ചേച്ചിക്കും ഇഷ്ടമാകും...
സുന്ദരനാ..."
വിദ്യ ചിരിച്ചു കൊണ്ട് പറഞ്ഞു...
നിത്യ അപ്പോഴും അവളെ നോക്കി പേടിപ്പിച്ചു...


"സൗദാമിനി.....'
നാരായണൻ മാഷിൻ്റെ ശബ്ദം..
അത് ഒരു സൂചനയാണ്...
നിത്യയെ കൊണ്ട് വരാൻ...


അമ്മ തട്ട് എടുത്ത് നിത്യയുടെ കൈയിൽ കൊടുത്തു.
അവളുടെ കൈയും കാലും വിറയ്ക്കാൻ തുടങ്ങി..

ഹൃദയം അനിയന്ത്രിതമായി പിടയുന്നു....
വിറയ്ക്കുന്ന കാൽവെപ്പുകളോടെ നടുമുറ്റത്തേക്ക് വന്നു...
മുഖം കുനിഞ്ഞ് പോയി.
വല്ലാത്ത വെപ്രാളം തന്നെ ബാധിക്കുന്നത് നിത്യ അറിഞ്ഞു...


മുഖം ഉയർത്താതെ ഹാളിലേക്ക് വന്നു.

"ഇതാ കുട്ടി..."
ദിനേശൻ നിത്യയെ ചൂണ്ടി പറഞ്ഞു.

പയ്യൻ്റെ അമ്മയുടെയും അനിയത്തിയുടെയും അച്ഛൻ്റെയും കണ്ണുകൾ നിത്യയിൽ പതിഞ്ഞു...
അവരുടെ മുഖം തെളിഞ്ഞു...
മുഖത്ത് സംതൃപ്തി...


"ചായ കൊടുക്ക് മോളെ.....'
ദിനേശൻ പറഞ്ഞു...

നിത്യ യാന്ത്രികമായി അതിഥികൾക്ക് മുൻപിൽ വന്നു നിന്നു.
മുഖം തെല്ല് പോലും ഉയർത്താൻ അവളുടെ വെപ്രാളം അനുവദിച്ചില്ല...


അമ്മയ്ക്കും സഹോദരിക്കും അച്ഛനും ചായ തട്ട് നീട്ടി. അവർ അതിലെ ഗ്ലാസ് എടുത്തു.
ചെക്കൻ്റെ മുൻപിലേക്കും തട്ട് നീട്ടി...


"മുഖമുയർത്തി നോക്ക് മോളെ... നാണിക്കുക ഒന്നും വേണ്ട..."
ദിനേശൻ പറഞ്ഞു....


വെളുത്ത നിറം..
ഒത്തഉയരം..
കട്ടിമീശ....
മനസിൽ വിദ്യ പറഞ്ഞ വാക്കുകൾ...


നിത്യ പരിഭ്രമത്തോടെ മുഖമുയർത്തി..
മുൻപിൽ ഇരിക്കുന്ന ആളെ കണ്ടതും നിത്യ ഷോക്കേറ്റത് പോലെ വിളറി..
കണ്ണുകൾ മിഴിഞ്ഞു...
ചെറുക്കൻ്റെ മുഖത്തും പതറൽ ഉണ്ട്...

വല്ലവിധേനെയും അവിടുന്ന് രക്ഷപ്പെടുന്നത് പോലെ നിത്യ വന്നു.
അമ്മ അവർക്കിടയിലേക്ക് പോയതും അടുക്കള ചുമരും ചാരി നിത്യ നിന്നു.


"എങ്ങനെയുണ്ട് ആള്.. ഞാൻ പറഞ്ഞില്ലേ.... ആള് സുന്ദരനാണ് എന്ന്....."
വിദ്യ കളിയാക്കി....


"ശ്.... ശ്... പതുക്കെ... അതെന്നെ കോളജിൽ പഠിപ്പിക്കുന്ന സാറാ.... സിദ്ധാർത്ഥ് സാർ....."
നിത്യ പരിഭ്രമത്തോടെ പറഞ്ഞു...


കാത്തിരിക്കൂ...💜
വെറുതെ വായിച്ച് പോകാൻ പറ്റുന്ന കഥയാണ്..
അതായത് ഭയങ്കരമായ സംഭവങ്ങൾ ഒന്നും ഈ കഥയിൽ ഉണ്ടാകില്ല...

അപ്പൊൾ നിത്യയെ ഇഷ്ട്ടമായോ എന്ന് പറയണേ...