വൈഗ

തന്റെ അനിയത്തി അഞ്ജലി മെഡിസിൻ പാസ്സായതോടെ വീട്ടിൽ എല്ലാവരിലും ചില മാറ്റങ്ങൾ വന്നത് പോലെ തോന്നി
വൈഗയ്ക്ക്...ഒരിക്കൽ അമ്മായിയും അമ്മയും അടുക്കളയിൽ പതിഞ്ഞ ശബ്ദത്തിൽ എന്തോ സംസാരിച്ചു കൊണ്ടിരിക്കുമ്പോഴാണ് വൈഗ അങ്ങോട്ട് ചെന്നതും അവർ സംസാരം നിർത്തി വൈഗയോട് ചിരിച്ചു..

എന്താണ് ഒരു കള്ള ലക്ഷണം രണ്ടാളുടെയും മുഖത്ത്...
വൈഗ കളിയാക്കികൊണ്ട് ചോദിച്ചു.

എന്ത്..ഒന്ന് പോടീ അവിടന്ന്..
അമ്മായി മുഖത്തു ചിരി വരുത്തി കൊണ്ട് പറയുമ്പോഴും അമ്മ മുഖം തരാതെ കറിക്കുള്ള പച്ചക്കറികൾ അരിഞ്ഞു കൊണ്ടിരിക്കുന്നത് വൈഗ ശ്രെദ്ധിച്ചു.

അല്ലാ എന്തോ കുശുകുശുക്കുന്നത് കേട്ടല്ലോ...

ഹാ ഞങ്ങൾക്ക് അങ്ങനെ പലതും ഉണ്ടാവും... അതൊക്കെ ഇപ്പോൾ മക്കളോട് പറയാൻ പറ്റോ ശോഭേ...
അമ്മായി വൈഗയുടെ അമ്മയെ നോക്കി ചോദിച്ചു.

ആ... അതെ..
അമ്മ മറുപടി പറഞ്ഞെങ്കിലും
അമ്മ ഒഴിഞ്ഞു മാറുന്ന പോലെയാണ് വൈഗയ്ക്ക് തോന്നിയത്.

ആയിക്കോട്ടെ...ഞാൻ എന്തായാലും ഇവിടെ കട്ടുറുമ്പ് ആവുന്നില്ല...
എന്നും പറഞ്ഞു ഒരു ക്യാരറ്റും എടുത്ത് വൈഗ കോലായിലേക്ക് നടന്നു.

അവിടെ എത്തുമ്പോൾ അച്ഛനും അമ്മാവനും ഇതേപോലെ ചർച്ചയിലാണ്.. അവരും പതിഞ്ഞ ശബ്ദത്തിലാണ് സംസാരിക്കുന്നത്.. വൈഗയെ കണ്ടപ്പോൾ അവരും സംസാരം നിർത്തി..

ആഹാ കൊള്ളാലോ നിങ്ങൾക്കൊക്കെ എന്താ പറ്റിയേ... അടുക്കളയിൽ ചെന്നപ്പോൾ അമ്മയും അമ്മായിയും ചേർന്ന് എന്തോ പ്ലാൻ ഇടുന്നു... ഇവിടെ വന്നപ്പോൾ നിങ്ങൾ എന്തൊക്കെയോ  രഹസ്യമായി പറയുന്നു... എല്ലാവരും എന്നെ കാണുമ്പോൾ സംസാരം നിർത്തുകയും ചെയ്യുന്നു... എന്തോ കാര്യമായിട്ട് സംഭവിച്ചിട്ടുണ്ടല്ലോ... എന്തോ ഒന്ന് എന്നിൽ നിന്നും നിങ്ങൾ ഒളിക്കുന്നുണ്ട്... കുറച്ചുദിവസമായി ഞാൻ ഇത് കാണുന്നു...
എനിക്ക് ഇപ്പോൾ അറിയണം എന്താ നിങ്ങൾ പറഞ്ഞുകൊണ്ടിരുന്നത്...
വൈഗ കൃത്രിമ ദേഷ്യം കാണിച്ച് അവരോട് ചോദിച്ചു.

പെട്ടെന്ന് അമ്മാവന്റെ മുഖം ഗൗരവത്തിലായി.
ഇനിയും മറച്ചു വെക്കുന്നതിൽ കാര്യമില്ല കേശവാ... എല്ലാം തുറന്നു പറയുന്നത് തന്നെയാണ് നല്ലത്... എന്നായാലും പറയണം... എത്രയും പെട്ടെന്ന് ആയാൽ അത്രയും നല്ലത്...

അമ്മാവന്റെ അത്തരത്തിലുള്ള പറച്ചിൽ കേട്ട് കാര്യം എന്തോ ഗൗരവമുള്ളതാണെന്ന് വൈഗയ്ക്ക് തോന്നി.

എന്താ അച്ഛാ അമ്മാവൻ പറഞ്ഞത്...  എന്തു മറച്ചുവെക്കേണ്ട എന്നാണ് പറയുന്നത്...

വൈഗയുടെ ചോദ്യത്തിന് എന്തു പറയണമെന്ന് അറിയാതെ കേശവൻ തല താഴ്ത്തിയിരുന്നു.

എന്താ അച്ഛാ ഒന്നും മിണ്ടാത്തെ.. എന്താണേലും എന്നോട് ഒന്നു പറ... എന്നെ വെറുതെ ഇങ്ങനെ ടെൻഷൻ അടിപ്പിക്കാതെ...

മോളെ വൈഗേ...  അച്ഛന് അത് നിന്നോട് പറയാൻ മനപ്രയാസം ഉണ്ടാകും...  അതുകൊണ്ട് ഞാൻ തന്നെ നിന്നോട് പറയാം... ഞാൻ പറയുന്നത് കേട്ട് മോൾ ഒന്നും വിചാരിക്കരുത്...

ആദ്യം നിങ്ങൾ ഒന്നു പറ അമ്മാവാ...

അത് പിന്നെ... മഹി...

മഹിയേട്ടന് എന്തുപറ്റി...
മഹി എന്ന് കേട്ടതും വൈഗക്ക് ആധിയായി.

അത് കേട്ട് അകത്തു നിന്നും അമ്മയും അമ്മായിയും പുറത്തേക്കു വന്നു.

അത് പിന്നെ മോളെ മഹിയേട്ടന് ഒന്നും സംഭവിച്ചിട്ടില്ല... അവന്റെ കല്യാണകാര്യത്തെ പറ്റി സംസാരിക്കുകയായിരുന്നു ഞങ്ങൾ...

അമ്മായി അത് പറഞ്ഞതും വൈഗയ്ക്ക് നെഞ്ചിടിപ്പ് കൂടി. കവിളുകൾ ചുവന്നു. തന്റെയും മഹിയേട്ടന്റെയും കല്യാണം കാര്യം ആണ് ഇവർ ചർച്ച ചെയ്തു കൊണ്ടിരിക്കുന്നത്. കുഞ്ഞുന്നാൾ തൊട്ടു കേൾക്കുന്നതാണ് വൈഗ മഹിയുടെ പെണ്ണാണെന്ന്. ചെറുപ്പത്തിൽ അതിന്റെ അർത്ഥം തനിക്ക് അറിയില്ലായിരുന്നെങ്കിലും ബാല്യം യൗവനത്തിലേക്ക് വഴി മാറിയപ്പോൾ തൊട്ട് മനസ്സിൽ കൊണ്ടു നടക്കുകയാണീ  മഹിയേട്ടൻ തനിക്കുള്ളതാണെന്ന്. പ്രണയം പരസ്പരം തുറന്നു പറഞ്ഞിട്ടില്ലെങ്കിലും തന്റെ കണ്ണുകളിലെ പ്രണയം മഹിയേട്ടൻ എന്നേ തിരിച്ചറിഞ്ഞതാണ്. എഞ്ചിനീയറിംഗ് കഴിഞ്ഞു ബാംഗ്ലൂരിൽ വർക്കിന് കേറിയ പിന്നെ ഇപ്പോൾ ആറു മാസത്തിലൊരിക്കലെ നാട്ടിലേക്ക് വരാറുള്ളൂ.. നാട്ടിലുള്ളപ്പോഴൊക്കെ ഓരോ കാരണങ്ങൾ ഉണ്ടാക്കി ഇടയ്ക്കിടയ്ക്ക് വീട്ടിൽ വരും. ആ വരവ് തന്നെ കാണാൻ തന്നെയാണെന്ന് എനിക്കറിയാം.. ഇപ്പോഴിതാ കാത്തിരിപ്പിന് വിരാമമിട്ടുകൊണ്ട് തങ്ങളുടെ കല്യാണക്കാര്യം അമ്മാവനോടും അമ്മായിയോടും പറഞ്ഞിരിക്കുന്നു മഹിയേട്ടൻ..

മോളെ മഹിയുടെ കല്യാണം നടത്താൻ ഞങ്ങൾ തീരുമാനിച്ചിരിക്കുകയാണ്...
കല്യാണ പ്രായമൊക്കെയായല്ലോ... ഇനി വച്ച് നീട്ടുന്നില്ല...

അമ്മാവന്റെ വാക്കുകൾ കേട്ട് വൈഗയുടെ സന്തോഷത്തിനു അതിരില്ലായിരുന്നു.. താനും അത് തന്നെയാണല്ലോ ആഗ്രഹിച്ചിരുന്നതും.. എത്രയും പെട്ടെന്ന് തന്റെ മഹിയേട്ടന്റെ സ്വന്തമാകണം..
വൈഗയുടെ മുഖത്തെ സന്തോഷം കണ്ടു കൊണ്ട് അമ്മാവൻ പറഞ്ഞു തുടങ്ങി.

എന്നാൽ ഇനി പറയുന്ന കാര്യങ്ങൾ കേട്ട് മോള് വിഷമിക്കരുത്... നിങ്ങൾ കുഞ്ഞായിരികുമ്പോൾ ഞാനും നിന്റെ അച്ഛനും ചേർന്ന് വാക്കാലെ ഉറപ്പിച്ചതാണ്
നിങ്ങളുടെ കല്യാണം.. എന്നാലിപ്പോൾ കാര്യങ്ങൾ അങ്ങനെയല്ല... നമ്മളൊന്നു വിചാരിക്കും മക്കൾ മറ്റൊന്ന് വിചാരിക്കും... നമ്മൾ ആഗ്രഹിക്കുന്ന കാര്യങ്ങൾ മക്കളും കൂടി ആഗ്രഹിക്കണമെന്നില്ലല്ലോ...

അമ്മാവൻ ഇങ്ങനെയൊക്കെ പറയാൻ എന്താ ഇപ്പോൾ ഇണ്ടായെ...
വൈഗക്ക് ഒന്നും മനസ്സിലാവുന്നുണ്ടായിരുന്നില്ല.

മഹിയെ കൊണ്ട് മോളെ കെട്ടിക്കണം എന്നായിരുന്നു ഞങ്ങളുടെ ആഗ്രഹം.. അത് മോൾക്കും അറിയാവുന്നതല്ലേ...

എനിക്കൊന്നും മനസ്സിലാകുന്നില്ല ഒന്ന് തെളിച്ചു പറ അമ്മായി...

മഹിക്ക്... വേറൊരാളെ ഇഷ്ട ആണെന്ന് പറയുന്നു..

അത് കേട്ട് വൈഗയുടെ ഉള്ളിൽ ഒരു മിന്നൽ പിളർപ്പുണ്ടായി.
ഏയ് ഇതൊക്കെ ആരാ പറഞ്ഞെ നിങ്ങളോട്... നിങ്ങളെന്നെ പറ്റിക്കാൻ വേണ്ടി പറയുക അല്ലേ ഇതൊക്കെ...
നിറഞ്ഞു വന്ന കണ്ണാലെ മുഖത്ത് ചിരി വരുത്തിക്കൊണ്ട് വൈഗ എല്ലാവരോടുമായി ചോദിച്ചു.
അന്നേരം വൈഗയോട് എന്തുപറയണമെന്ന് അറിയാതെ തലതാഴ്ത്തി ഇരിക്കുകയാണ് വൈഗയുടെ അച്ഛൻ.. അമ്മയുടെയും അവസ്ഥ മറിച്ചായിരുന്നില്ല.. അവർക്കറിയാമായിരുന്നു വൈഗയ്ക് മഹിയോടുള്ള സ്നേഹം എത്ര ആഴത്തിൽ ആയിരുന്നുവെന്ന്..

എന്റെ മോളെ...
അമ്മായി വന്ന് വൈഗയുടെ കൈ പിടിച്ചു.

സത്യമായിട്ടും നീ എന്റെ മരുമകൾ ആയി വരണം എന്ന് തന്നെയാണ് എന്റെ ആഗ്രഹം...  പക്ഷേ മഹി മറ്റൊരാളെ ഇഷ്ടപ്പെടുന്നുവെന്ന് പറയുമ്പോൾ അവനെ നിർബന്ധിച്ചു നിന്നെ കൊണ്ട് കെട്ടിച്ചാൽ ചിലപ്പോൾ നാളെ നിങ്ങളുടെ ദാമ്പത്യജീവിതത്തിൽ നിങ്ങൾ തോറ്റുപോകും... അത് താങ്ങാൻ ആവുന്നതല്ല...  അതിലും നല്ലത് എല്ലാം നീ ഇപ്പോൾ അറിയുന്നതാണ്...

അപ്പോൾ അമ്മായി പറഞ്ഞുവരുന്നത് മഹിയേട്ടന് എന്നെ വേണ്ട എന്നാണോ...ഇല്ല മഹിയേട്ടൻ അങ്ങനെ പറയില്ല...

മോളെ ഞങ്ങൾ എന്തിന് നിന്നോട് കള്ളം പറയണം... ഞങ്ങൾ ആവുന്നതും അവനോട് പറഞ്ഞു നോക്കി... എന്നാൽ മനസ്സിൽ ഒരാളെ വെച്ച് നിന്റെ കൂടെ ജീവിക്കാൻ കഴിയില്ല എന്നാണ് അവൻ പറയുന്നത്...



തുടരും...