രചനകൾക്ക് കവർ ചിത്രങ്ങൾ തിരഞ്ഞെടുക്കുമ്പോൾ ശ്രദ്ധിക്കേണ്ട കാര്യങ്ങൾ

പ്രിയ രചയിതാവേ,

വായനക്കാർ ആദ്യം ശ്രദ്ധിക്കുന്നത് നിങ്ങളുടെ കഥയുടെ കവർ ചിത്രമാണ്.

ഒരു നല്ല കവർ ചിത്രം ഭംഗിയുള്ളതായാൽ മാത്രം പോരാ. കവർ ചിത്രത്തിലൂടെ കഥയുടെ സ്വഭാവവും, വിഭാഗവും വായനക്കാരന് അറിയാൻ കഴിയണം. കവർ ചിത്രത്തിന് കഥയുമായി ബന്ധമില്ലെങ്കിൽ, വായനക്കാർ കഥ വായിക്കാതിരിക്കാനും കഥ വായിക്കുമ്പോൾ അവർക്ക് നിരാശ തോന്നാനും ഒക്കെ സാധ്യതയുണ്ട്.

1. കഥയ്ക്ക് ചേരുന്ന കവർ ചിത്രം തിരഞ്ഞെടുക്കാം

നിങ്ങളുടെ കവർ ചിത്രത്തിന് നിങ്ങളുടെ കഥയെ ഉൾക്കൊള്ളാൻ കഴിയണം. നിങ്ങളുടെ കഥ ആളുകളുടെ ഉള്ളിൽ ജനിപ്പിക്കുന്ന വികാരം എന്താണെന്ന് കവർ ചിത്രത്തിൽ നിന്ന് തന്നെ വായനക്കാർക്ക് അറിയാൻ കഴിയണം.

2. കഥയുടെ വിഭാഗം ഒറ്റനോട്ടത്തിൽ മനസ്സിലാകണം

കവർ ചിത്രം കണ്ടാൽ തന്നെ ഇത് ഏത് വിഭാഗത്തിൽ വരുന്ന കഥയാണെന്ന് വായനക്കാർക്ക് മനസ്സിലാകണം. ഒരു പ്രണയകഥയാണ് എഴുതുന്നതെങ്കിൽ അതിനോട് ചേർന്ന് നിൽക്കുന്ന കവർ ചിത്രം നൽകണം. പ്രേതകഥയുടെ കവർ ചിത്രങ്ങൾ എപ്പോഴും പേടിപ്പെടുത്തുന്നവ ആകണം.

3. വായനക്കാരെ തെറ്റിദ്ധരിപ്പിക്കരുത്

കഥയുമായി യാതൊരു ബന്ധവുമില്ലാത്ത കവർ ചിത്രം ഒരിക്കലും ഉപയോഗിക്കരുത്. ഇത് വായനക്കാരിൽ തെറ്റിദ്ധാരണ ഉണ്ടാക്കാൻ കാരണമാകും. ഉദാഹരണത്തിന്, ഒരു ക്രൈം ത്രില്ലറിന് പ്രണയകഥയുടെ കവർ ചിത്രം നൽകിയാൽ, പ്രണയ കഥ ഇഷ്ടപ്പെടുന്നവരെ ആകും നിങ്ങൾ കഥയിലേക്ക് ആകർഷിക്കുക. എന്നാൽ അവർക്ക് ഒരു ക്രൈം ത്രില്ലർ ഇഷ്ടപ്പെട്ടെന്ന് വരില്ല.

4. സെലിബ്രിറ്റികളുടെ ചിത്രങ്ങൾ ഒഴിവാക്കാം

സെലിബ്രിറ്റികളുടെ ചിത്രങ്ങൾ ഉപയോഗിക്കുന്നത് നിങ്ങളുടെ കഥയുടെ പുതുമ കുറയ്ക്കുകയും ഭാവിയിൽ കോപ്പിറൈറ്റ് പ്രശ്നങ്ങൾ ഉണ്ടാക്കുകയും ചെയ്യാം. അതിനാൽ ഇവ പൂർണ്ണമായും ഒഴിവാക്കാൻ ശ്രദ്ധിക്കണേ.

5. കഥയെക്കുറിച്ചുള്ള സൂചനകൾ നൽകാൻ മറക്കരുത്

കഥയുടെ സ്വഭാവം, വിഭാഗം അങ്ങനെ കഥയെ കുറിച്ച് മനസ്സിലാക്കാൻ സഹായിക്കുന്ന എന്തെങ്കിലും ഒക്കെ സൂചനകൾ കവർ ചിത്രത്തിൽ എന്തായാലും ഉൾപ്പെടുത്തണം.

ഉദാഹരണത്തിന്:

• മെഡിക്കൽ ഡ്രാമയാണെങ്കിൽ ആശുപത്രി ഉൾപ്പെടുത്താം

• സസ്പെൻസ് അല്ലെങ്കിൽ മിസ്റ്ററിയാണെങ്കിൽ ഒരു നിഴൽ അല്ലെങ്കിൽ പേടി തോന്നുന്ന ഒരു സാഹചര്യം കവർ ചിത്രത്തിൽ കൊണ്ടുവരാം

6. കവർ ചിത്രത്തിന് നിറങ്ങൾ തിരഞ്ഞെടുക്കുമ്പോൾ

നിറങ്ങൾ വായനക്കാരെ ആകർഷിക്കാൻ സഹായിക്കും. കഥയുടെ ഒരു സ്വഭാവം കവർ ചിത്രത്തിൽ കൊണ്ടുവരാനും ചില നിറങ്ങൾ നിങ്ങളെ സഹായിക്കും. അതിനാൽ നിറങ്ങൾ ശ്രദ്ധയോടെ തിരഞ്ഞെടുക്കണം.

• ഇരുണ്ട നിറങ്ങൾ – മിസ്റ്ററി, ത്രില്ലർ, ഹൊറർ

• ഇളം അല്ലെങ്കിൽ തിളക്കമുള്ള നിറങ്ങൾ – പ്രണയം, കോമഡി, ലൈറ്റ് ഡ്രാമ

7. പ്രസിദ്ധീകരിക്കുന്നതിന് മുമ്പ്

കഥ പ്രസിദ്ധീകരിക്കുന്നതിന് മുമ്പ് ഈ കവർ ചിത്രം കണ്ടാൽ 3 സെക്കൻഡിനുള്ളിൽ കഥയെ കുറിച്ച് ചെറിയ സൂചനകൾ വായനക്കാരന് ലഭിക്കുമോ? എന്നൊന്ന് സ്വയം ചോദിച്ചു നോക്കൂ

നിങ്ങളുടെ ഉത്തരം ഇല്ല എന്നാണെങ്കിൽ, കൂടുതൽ ആകർഷകവും അനുയോജ്യവുമായ മറ്റൊരു കവർ ചിത്രം തിരഞ്ഞെടുക്കൂ.

കവർ ചിത്രം ഒരു അലങ്കാരം മാത്രമല്ല. വായനക്കാരന് നിങ്ങൾ നൽകുന്ന ആദ്യ വാഗ്ദാനമാണ്.

ശരിയായ കവർ ചിത്രം ശരിയായ വായനക്കാരെ ആകർഷിക്കും, കഥയെക്കുറിച്ച് ശരിയായ പ്രതീക്ഷ നൽകും, അവർ കഥ മുഴുവൻ വായിക്കാനുള്ള സാധ്യതയും വർദ്ധിപ്പിക്കും.

ആശംസകളോടെ!

– ടീം പ്രതിലിപി