പ്രതിലിപി12 വർഷത്തെ നമ്മുടെ ഒരുമിച്ചുള്ള യാത്ര ❤️
നമസ്കാരം,
ഞാൻ നിങ്ങളുടെ സ്വന്തം ലിപി.
ഈ വർഷം നിങ്ങൾക്കായി ഞാൻ രണ്ട് കത്തുകൾ അയച്ചിരുന്നു. (വായിക്കാത്തവർക്കായി- കത്ത്:1, കത്ത്:2 )
പറഞ്ഞറിയിക്കാനാവാത്ത സന്തോഷത്തിലാണ് ഞാനിന്ന് ഈ കത്തെഴുതുന്നത്. ഈ വർഷം പ്രതിലിപി തന്റെ 12 വർഷങ്ങൾ പൂർത്തിയാക്കി. ഇക്കഴിഞ്ഞ സെപ്റ്റംബർ 14-ന് പ്രതിലിപിയുടെ 12-ാമത് ജന്മദിനം ആയിരുന്നു.
12 വർഷങ്ങൾക്ക് മുമ്പ് പ്രതിലിപി എന്ന സ്വപ്നം ആരംഭിക്കുമ്പോൾ ഞങ്ങളുടെ ലക്ഷ്യം വളരെ സിമ്പിൾ ആയിരുന്നു. ഭാഷയുടെയോ, സ്ഥലത്തിന്റെയോ, ഡിവൈസിന്റെയോ പരിമിതികളില്ലാതെ ഒരു എഴുത്തുകാരന് തന്റെ വരികളെ വായനക്കാരിലേക്ക് എത്തിക്കാൻ ഒരിടം, അതായിരുന്നു പ്രതിലിപി.
ഇന്ന് നിങ്ങൾക്ക് ഏതൊരു സ്ഥലത്തുനിന്നും, ഏതൊരു ഡിവൈസിലൂടെയും ഇന്ത്യയിലെ ഏത് ഭാഷയിലും കഥയെഴുതാം. ഓഡിയോ, പുസ്തകം, മൈക്രോ ഡ്രാമ, സീരിയൽ എന്നിങ്ങനെ നിങ്ങളുടെ രചന ആളുകളിലേക്ക് എത്തിക്കാനുള്ള മാർഗ്ഗങ്ങളും സാധ്യതകളും ഏറെയാണ്. ആയിരക്കണക്കിന് എഴുത്തുകാർക്ക് തങ്ങളുടെ രചനയിലൂടെ ജീവിത വരുമാനം നേടാൻ സാധിക്കുന്നു എന്നുള്ളത് ഞങ്ങളുടെ സ്വപ്നം വിജയകരമായി മുന്നോട്ട് പോയിക്കൊണ്ടിരിക്കുന്നു എന്നതിന്റെ തെളിവാണ്.
പിന്നെ, ഇത് വെറുമൊരു തുടക്കം മാത്രമാണെന്ന് ഓർമ്മിപ്പിക്കേണ്ടതില്ലല്ലോ? ഇതിലേറെ മനോഹരമായ, വിജയകരമായ സ്വപ്നങ്ങൾ പ്രതിലിപി ഇന്നും നിങ്ങൾ രചയിതാക്കളും വായനക്കാരും കാരണം കണ്ടുകൊണ്ടിരിക്കുന്നുണ്ട്.
നമ്മുടെ ഈ യാത്രയിൽ ഇതുവരെ നേടിയ നേട്ടങ്ങളിലേക്ക് ഒന്ന് തിരിഞ്ഞു നോക്കിയാലോ?
1: കഴിഞ്ഞ 12 മാസത്തിനിടെ മാത്രം പ്രതിലിപിയിലെ എഴുത്തുകാർ നേടിയത് 38.2 കോടി രൂപയാണ്. ഇത് 2025-ൽ 24.9 കോടിയും 2024-ൽ 14.8 കോടിയുമായിരുന്നു.
2: 2026 ഓഗസ്റ്റിലെ കണക്കനുസരിച്ച്, പ്രതിലിപിയിലൂടെ 10,104 രചയിതാക്കൾ വരുമാനം നേടുന്നുണ്ട്. 2025-ൽ 9,764 രചയിതാക്കളും 2024-ൽ 8,112 രചയിതാക്കളും ആയിരുന്നു.
3: 2026-ൽ ചില മാസങ്ങളിൽ 1 ലക്ഷം രൂപയ്ക്ക് മുകളിൽ വരുമാനം നേടിയ 90 എഴുത്തുകാരുണ്ട്. ഓഗസ്റ്റ് മാസത്തിൽ മാത്രം 55 രചയിതാക്കൾക്ക് 1 ലക്ഷത്തിന് മുകളിൽ വരുമാനം നേടാൻ സാധിച്ചു.
4: നിലവിൽ പ്രതിമാസം 5,000 രൂപയിൽ കൂടുതൽ നേടുന്ന 870 പേരും, 10,000 രൂപയ്ക്ക് മുകളിൽ സമ്പാദിക്കുന്ന 543 പേരും, 25,000 രൂപയിൽ അധികം വരുമാനം ലഭിക്കുന്ന 268 എഴുത്തുകാരുമുണ്ട്.
5: ഓരോ വായനക്കാരനും പ്രതിലിപിയിൽ ദിവസേന ആവറേജ് 1 മണിക്കൂറും 14 മിനിറ്റും ചെലവഴിക്കുന്നുണ്ട്. ഇത് യൂട്യൂബിനേക്കാൾ കൂടുതലാണ് എന്നറിയാമോ? എന്നാൽ നിങ്ങളുടെ സബ്സ്ക്രൈബേഴ്സ് ദിവസവും 2 മണിക്കൂർ 36 മിനിറ്റിലധികം നിങ്ങളുടെ രചനകൾ വായിക്കാനായി സമയം ചെലവഴിക്കുന്നുണ്ട്.
ഇനിയും ഒരുപാട് ദൂരം സഞ്ചരിക്കാനുള്ള ഒരു വലിയ സ്വപ്നത്തിന്റെ തുടക്കത്തിൽ മാത്രമാണ് പ്രതിലിപി ഇപ്പോൾ എന്നറിയാം. പത്തോ ഇരുപതോ വർഷം തളിർത്തുനിന്ന് വാടിപ്പോകേണ്ട ഒരു മരമല്ല പ്രതിലിപി. മറിച്ച്, ഓരോ പതിറ്റാണ്ടുകൾ കഴിയുന്തോറും തണലും കുളിരും നൽകി പടർന്നു പന്തലിച്ചു നിൽക്കേണ്ടതാണ്. വർഷം കൂടുന്തോറും വീര്യമേറുന്ന വീഞ്ഞു പോലെ!
ഈ മധുരമേറിയ സ്വപ്നത്തിൽ ഞങ്ങൾ ഏറ്റവും കൂടുതൽ ചേർത്തുപിടിക്കുന്നത് നിങ്ങൾ എഴുത്തുകാരെയാണ്. പൂർണ്ണ സത്യസന്ധതയോടെയും വിശ്വസ്തതയോടെയും എല്ലാത്തിനുമുപരി നിങ്ങളുടെ എഴുത്തുകൾക്കായി സുരക്ഷിതമായ ഒരിടം ഒരുക്കിയും പ്രതിലിപി നിങ്ങളോടൊപ്പം ഈ യാത്ര സഞ്ചരിക്കും.
“എഴുത്തുകാരുടെ യൂട്യൂബ് ആണ് പ്രതിലിപി” എന്ന പരസ്യമായ രഹസ്യം ഞാനും കേട്ടിട്ടുണ്ട്. ശരിയാണ്, ഇന്ന് പ്രതിലിപിയിൽ ഫേമസ് യൂട്യൂബർമാരേക്കാൾ വരുമാനം ലഭിക്കുന്ന രചയിതാക്കൾ ഉണ്ടെന്ന രഹസ്യം ഞാനും പരസ്യമാക്കിക്കോട്ടെ? പക്ഷേ, ശ്രദ്ധിക്കേണ്ട കാര്യം, പ്രതിലിപി ഇതിൽ മാത്രം ഒതുങ്ങുന്നതല്ല. പ്രതിലിപി നിങ്ങളുടെ ക്രിയേറ്റിവിറ്റിക്കായിട്ടുള്ള ഒരു ഇക്കോ-സിസ്റ്റം ആണ്.
ഇക്കോ സിസ്റ്റം എന്നുള്ളത് കൊണ്ട് ഉദ്ദേശിച്ചത്: നിങ്ങൾ പ്രതിലിപിയിൽ എഴുതുന്ന ഒരു രചനയ്ക്ക് നാളെ വേണമെങ്കിൽ ഒരു കോമിക് കഥയാവാനോ, എഫ്.എമ്മിലൂടെ ഓഡിയോ പുസ്തകമാവാനോ, മൈക്രോ-ഡ്രാമ, സീരിയൽ എന്നിങ്ങനെയുള്ള രീതിയിൽ ഒരു വിഷ്വൽ സ്റ്റോറിയാവാനോ ഉള്ള സാധ്യതകൾ ഉണ്ട്. വെറും ഒരു രചന തന്നെ പല രീതിയിൽ ഒരുപാട് ആളുകളിലേക്ക് എത്തിക്കാൻ സാധിക്കുന്ന ഈ ഇക്കോ സിസ്റ്റം ആണ് പ്രതിലിപിയെ വ്യത്യസ്തമാക്കുന്നത്.
ഈ ലക്ഷ്യത്തിലേക്ക് എത്തി ചേരാൻ സമയം പിടിക്കും എന്നറിയാം, പക്ഷേ നിങ്ങൾ രചയിതാക്കൾക്കൊപ്പം ഈ നീണ്ട വഴി ഒരുമിച്ച് കയറാൻ ഞങ്ങൾ ഒരുങ്ങിക്കഴിഞ്ഞു.
ഞങ്ങളെ വിശ്വസിക്കുകയും കൂടെ നിൽക്കുകയും ചെയ്ത നിങ്ങൾ ഓരോരുത്തർക്കും നന്ദി.
ഞങ്ങൾക്ക് ഇന്നിവിടെ നിൽക്കാൻ കഴിഞ്ഞത് നിങ്ങൾ കാരണമാണ്.
ഞങ്ങളോട് നിങ്ങൾക്ക് എന്തെങ്കിലും പങ്കുവെക്കാനുണ്ടെങ്കിൽ ദയവായി താഴെയുള്ള ലിങ്കിലൂടെ ഷെയർ ചെയ്യുമല്ലോ?
സ്നേഹത്തോടെ,
നിങ്ങളുടെ സ്വന്തം ലിപി.